Milli kinematoqrafiyamızın bənzərsiz nümunələri sırasında fantastik janrda çəkilən filmlərin də adını çəkmək olar. Ədəbiyyatımızda olan şərti-metaforizm nümunələrini kinoya köçürmək və ya kino üçün mifik obrazlar yaratmaq böyük məharət tələb edir.

İllər keçməsinə baxmayaraq, hələ də maraqla izlənilən "Qərib cinlər diyarında", "Bir qalanın sirri", "Sehrli xalat" kimi filmlər istər forma, istərsə də məzmun baxımından böyük sənətkarlıq nümunəsidir. Bu filmlərdəki mifik rolları canlandıran aktyorlar bəzən tamaşaçının yaddaşında adlarından çox rolları ilə qalır.

Axar.az Azərbaycan kinosunda canlandırılan mifik obrazları təqdim edir:

Böyük div

Unudulmaz sənətkar Eldəniz Zeynalov "Əzablı yollar" filmində Böyük div rolunu canlandırıb. "Məlikməmmədin nağılı" adlı Azərbaycan xalq nağılının motivləri əsasında çəkilmiş bu film insanları xeyirxah olmağa çağırır. Film 1989-cu ildə ABŞ-da 17 ən yaxşı sovet kinolenti siyahısına daxil edilib.

Zərri

Xalq artisti Amaliya Pənahova "Qərib cinlər diyarında" filmində canlandırdığı Zərri obrazı kinematoqrafiyamızda ən uğurlu əcinnə obrazıdır. "Qərib cinlər diyarında" filmi var-dövlət arzusu ilə yaşayan kasıb kəndli balası Qəribin sərgüzəştlərindən bəhs edir. Qəribin arzusundan xəbər tutan cinlər padşahı Akşad onu öz diyarına dəvət edir, o da razılıq verir. İlk baxışda elə görünür ki, Qərib məqsədinə çatıb, ancaq çox keçmir ki, o, evləri, anası, sevgilisi üçün darıxmağa başlayır. Sevgilisinin cildinə girib onu yoldan çıxarmaq istəyən Zərrinin "soyuqluğuna" görə Qərib onu sevdiyindən fərqləndirə bilir.

İblis

"Qərib cinlər diyarında" filmində İblis rolunu Azərbaycanın ilk nağıl cəngavəri, daha çox "Bir qalanın sirri" filmindəki Elşən kimi tanıdığımız Gündüz Abbasov canlandırıb.

Əsra-Kəsra

Həmin filmdə hər kəsin böyük sevgisini qazanan təlxəklər – Əsra ilə Kəsra da yaddaqalan obrazlardır. Kəsra rolunu aktrisa Gülşən Qurbanovanın həyat yoldaşı, mərhum aktyor Mübariz Əlixanoğlu, Əsra rolunu isə aktyor Ələsgər Məmmədoğlu oynayıb.

Cin

"Cin mikrorayonda" filmindəki Cin rolunun ifaçısı Rəşid Mahmudzadədir. Filmdə cin obrazı rəmzidir. Onun müasir məkanda müasir adamlarla ünsiyyətə girməsi tamamilə şərti xarakter daşıyır. Filmin ideyası, aşıladığı fikir də məhz bu şərtilik fonunda çatdırılır. Filmin sonunda gəlinən qənaət budur ki, süni şəkildə əldə edilən heç bir uğur insana mənəvi zövq vermir və həyat maraqsızlaşır.

Göygöz Kosa

Milli kinematoqrafiyanın ilk rəngli filmi olan "Bir qalanın sirri" 1959-cu ildə lentə alınıb. Filmin adı əvvəlcə "Qanlı qala" olsa da, sonradan sovet rəhbərliyi uşaqlara aid bir filmdə qan sözünün işlənməsinə qarşı çıxıb və bu ekran əsəri "Bir qalanın sirri" kimi tarixə düşüb. Filmdə cadugər Göygöz Kosa obrazını mərhum sovet aktyoru Andrey Fayt canlandırıb.