Ana səhifə Kult |
Efirdə mətbəx verilişləri formatını dəyişməli, ailələrin zənbil qiymətlərinə uyğun hazırlanmalıdır.
Bu sözləri Axar.az-a Təmiz Dünya Qadınlara Yardım İctimai Birliyinin sədri Mehriban Zeynalova deyib.
Onun fikrincə, həmin verilişlərin çox olması yaxşı hal deyil:"Az qala efirdə 4-5 saatın yeməyin necə bişirilməsinə, hansısa salatın necə hazırlanmasına ayrılması, mətbəx mövzularının aktual sosial məsələlərin müzakirəsini, intellektual, maarifləndirici verilişləri üstələməsi yaxşı hal deyil".
Psixoloq Elnur Rüstəmova görə, mətbəx verilişləri tamaşaçılarda qıcıq yaradır:"Ümumilikdə isə mətbəx verilişlərinin efirdən yığışdırılmasının əleyhinəyəm.Çünki bununla hansısa problemin həll olunacağını gözləmək yanlış olar. Bu cür verilişlərin kütləvi hal alması təqdirəlayiq deyil".
Psixoloq Nail Cəlil isə düşünür ki, bu cür verilişlərin tez-tez yayımlanması tamaşaçı zövqünün korlanmasına səbəb olur:"Nəyi necə öyrənməkdən, eləcə də belə verilişlərin necə hazırlanmasından, təqdimatından çox şey asılıdır. Doğrudur, bu və ya digər mətbəx məhsulunun, süfrəni bəzəyən qidaların canlı şəkildə hazırlanıb efirdə insanlara təqdim olunması maraqlı bir prosesdir.
Ancaq bunu daimi şouya çevirmək efiri vizual mətbəx halına gətirir. Fikrimcə, mətbəx verilişləri, onların tərtibatı, təqdimatı ilə bağlı ciddi nizamlayıcı tələblər, qaydalar hazırlanmalıdır. Yəni indiki halda adi bir xörək reseptini saatlarla izah etməyin özü efir vaxtını öldürmək, boş yerə xərcləməkdir".
Tarix
2016.01.14 / 08:00
|
Müəllif
Fatimə İbrahimova
|