Bu gün yazıçı Aqil Abbasın doğum günüdür.

Axar.az xatırladır ki, Aqil Abbas 1953-cü il aprelin 1-də Ağcabədi rayonunun Kolalı kəndində doğulub. 1955-ci ildə, 2 yaşı olarkən ailəsi ilə birlikdə Ağdama köçüb.

Ağdam 1 saylı orta məktəbini bitirdikdən sonra ADU-nun filologiya fakültəsində təhsilini davam etdirib. Əmək fəaliyyətinə Ağsu rayonundakı internat məktəbində müəllim kimi başlayıb, "Elm və həyat" jurnalında fotomüxbir, şöbə müdiri, "Sovet kəndi" qəzetinin xüsusi müxbiri işləyib. Hazırda "Ədalət", "Boz qurd" qəzetlərinin baş redaktorudur.

Bədii yaradıcılığa 1970-ci ildən başlasa da, ilk mətbu hekayəsi "Şirinlik" 1976-cı ildə "Ədəbiyyat və incəsənət" qəzetində dərc olunub. Bunun ardınca 1977-ci ildə "Şəbədə Nazim" hekayəsi "Ulduz" və "Azərbaycan" jurnallarında işıq üzü görüb.

Aqil Abbas "Qiyamət gecəsi" və "Qapqara uzun saçlar" povestlərinin, "Batmanqılınc", "Dolu" romanlarının müəllifidir.

O, 2005-ci ildə Azərbaycan Milli Məclisinin deputatı seçilib.

Əməkdar jurnalist, AYB üzvü, "Qızıl qələm", "Məmməd Araz" adına ədəbi mükafat, "Dan ulduzu", "Yaddaş" və "Zeynalabdin Tağıyev" mükafatları laureatı olan Aqil Abbasın "Dolu" romanı əsasında 2012-ci ildə "Dolu" filmi çəkilib.

Jurnalist həmkarımızı təbrik edirik!