Ermənistanın qarmon ifaçısı Qagik Stepanyan Azərbaycan mahnısını oğurlayıb.

Kult.az Unikal-a istinadən xəbər verir ki, sözləri Fikrət Qocaya, musiqisi isə Ramiz Mirişliyə məxsus olan "Ay bəri bax" mahnısının müəllif hüquqları pozulub.

Sözügedən mahnını ilk dəfə SSRİ xalq artisti Zeynəb Xanlarova, daha sonra Azərbaycan Respublikasının xalq artisti Gülyanaq Məmmədova ifa edib.

Məsələ ilə bağlı "Unikal"a açıqlamasında Gülyanaq Məmmədova bildirib ki, mahnını Zeynəb xanımdan sonra ilk dəfə 1994-cü ildə məhz o oxuyub:

"Bizim mənfur qonşularımız ümumiyyətlə həmişə bizim musiqimizə göz dikiblər. Çünki onların özlərinə məxsus heç nəyi olmayıb. Onlar hər zaman bizdən nələrisə oğurlayıblar. İstər kulinariyamız olsun, istər musiqimiz, mədəniyyətimiz, ən əsası torpağımızı oğurlayıblar, bundan artıq nəyi deyək ki?

Həmin şəxs heç olmasa Azərbaycan mahnısına "bizimdir" deməsin və yaxud anonim yazmasın. Musiqini isə düz ifa edib. Əgər paylaşımında istinad etməyibsə, təbii ki, qaldırılası mövzudur".