Türkiyə Xarici İşlər Nazirliyi İsrail Nazirlər Kabinetinin Qəzzanı işğal etmək qərarını pisləyib.

Axar.az xəbər verir ki, bu barədə Türkiyə XİN-in bəyanatında qeyd olunub.

“İsrailin bölgədəki işğalçı və soyqırımçı siyasətinin yeni bir mərhələsini təşkil edən Qəzzadakı hərbi əməliyyatlarını genişləndirmə qərarını ən kəskin şəkildə qınayırıq.

Netanyahu hökumətinin fələstinlilərə qarşı həyata keçirdiyi soyqırımı davam etdirmək və işğalı genişləndirmək üçün atdığı hər bir addım beynəlxalq sülh və təhlükəsizliyə ağır zərbə vurur, bölgədə sabitliyi pozur və humanitar böhranı daha da dərinləşdirir. Bölgəmizdə davamlı sülhün təmin olunması yalnız beynəlxalq hüququn aliliyi, diplomatiyaya üstünlük verilməsi və əsas insan hüquqlarının qorunması ilə mümkündür.

İsrail müharibə planlarını dərhal dayandırmalı, Qəzzada atəşkəsi qəbul etməli və iki dövlətli həll istiqamətində danışıqlara başlamalıdır. Bu qərarın həyata keçirilməsinin qarşısını almaq üçün beynəlxalq ictimaiyyəti üzərinə düşən məsuliyyəti yerinə yetirməyə və BMT Təhlükəsizlik Şurasını İsrailin beynəlxalq hüquqa və humanitar dəyərlərə zidd hərəkətlərinin qarşısını alacaq məcburi qərarlar qəbul etməyə çağırırıq”, - bəyanatda bildirilib.