Rusiya və Belarus Polşanın kritik infrastrukturuna qarşı təxribat əməliyyatları həyata keçirə və Ukraynanı onlara görə günahlandıra bilər.

Axar.az xəbər verir ki, bu barədə ABŞ-ın Müharibənin Öyrənilməsi İnstitutu məlumat yayıb.

“Sentyabrın 30-da Rusiyanın Xarici Kəşfiyyat Xidməti qeyd edib ki, Ukrayna Rusiya və Belarusu günahlandırmaq üçün “başqa dövlətin bayrağı altında” Polşanın kritik infrastrukturuna hücum hazırlayır. İddialara görə, Ukrayna Müdafiə Nazirliyinin Baş Kəşfiyyat İdarəsi və Polşa kəşfiyyatı Polşaya Ukrayna tərəfdarı olan “Rusiya Azadlığı” legionu və Kastus Kalininski alayının Rusiya və Belarus vətəndaşlarından ibarət təxribat və kəşfiyyat qrupu göndərəcək. Bu qoşunlar Polşa təhlükəsizlik xidmətləri tərəfindən əsir götürüldükdən sonra mətbuat konfransında özlərini Rusiya və Belarus xüsusi təyinatlıları kimi təqdim edəcək və ukraynayönlü birləşmələr hücuma görə Rusiya və Belarusu günahlandıracaqlar. Rusiya kəşfiyyatı iddia edir ki, Ukrayna ictimai rezonansı artırmaq üçün eyni vaxtda Polşanın kritik infrastrukturuna hücum həyata keçirə bilər. Kiyev NATO hava məkanında baş verən son dron insidentlərindən istifadə edərək Polşada antirusiya əhval-ruhiyyəsini gücləndirmək, müharibənin qızışmasını sürətləndirmək və Avropa ölkələrini Ukrayna adından münaqişəyə müdaxilə etməyə sövq etməyə də cəhd edə bilər”, - məlumatda deyilib.