Müdafiə Qüvvələri təkcə Moskvada və ya Belqorodda elektrik kəsintisi üçün zərbələr endirməklə kifayətlənməməli, eyni zamanda Rusiyanın büdcəsini dolduran obyektlərə zərbələr endirməlidir.

Axar.az xəbər verir ki, bunu XXI Strategiya Qlobal Araşdırmalar Mərkəzinin təhlükəsizlik proqramlarının rəhbəri Pavel Lakiyçuk deyib.

“Biz düşmən üçün əsas əhəmiyyət daşıyan nöqtələrə zərbələr vurmalıyıq. Bu isə nə Moskvada, nə də Belqorodda “blekaut” (elektrik enerjisinin kütləvi kəsilməsi) yaratmaq variantıdır. Əsas məqsəd düşmənin müharibə maşınını maliyyələşdirən, Ukraynaya qarşı müharibəni davam etdirmək imkanını məhv edən zərbələrdir. Bu da məhz energetika, neft-qaz kompleksi, tranzit, nəqliyyat və ixrac potensialına endirilən zərbələrdir”, – deyə o bildirib.

Onun sözlərinə görə, bu cür zərbələr Rusiyanın müharibə büdcəsini sıradan çıxarır və faktiki olaraq onu heçə endirir. Məhz bu tədbirlər orta və uzunmüddətli perspektivdə nəticə verməlidir.

“Qısamüddətli perspektiv də qalır, çünki cəbhəni, cəbhədəki döyüşçülərimizi dəstəkləmək lazımdır. Bu isə orta səviyyəli zərbələrdir – sursat anbarlarına, “Şahid” anbarlarına, raket və dron anbarlarına, eləcə də digər yanacaq-sürtkü materialları saxlanılan anbarlara endirilən zərbələrdir”, – Lakiyçuk vurğulayıb.