Rusiya Ukrayna ətrafında eyni vaxtda 96 ədəd 9M729 tipli raket buraxa bilən 24 yeni “İsgəndər-M1” operativ-taktiki raket kompleksi (OTRK) yerləşdirib. Bu raketlərin uçuş məsafəsi 1500 km-dir və Lvov və Ujqorod şəhərlərinə çata bilir.

Axar.az xəbər verir ki, bu barədə “Defense Ekspress” nəşrinin analitikləri bildiriblər.

Nəşr qeyd edir ki, söhbət Rusiyanın 2022-ci ildən Ukraynaya zərbələr endirmək üçün istifadə etdiyi 9M729 “Novator” qanadlı raketlərindən gedir.

Bildirilir ki, bu, həqiqətən də yerüstü uzaqmənzilli qanadlı raketdir və onun yaradılması Kreml tərəfindən Orta və Qısa Mənzilli Raketlər Müqaviləsinin pozulması hesab olunur. Raketin rəsmi uçuş məsafəsi 1500 km göstərilsə də, 2000 və hətta 2500 km barədə məlumatlara da rast gəlinir.

Analitiklərin fikrincə, bu xüsusiyyətlər Rusiyaya “İsgəndər” OTRK-nin standart buraxılış mövqelərindən Ukraynanın istənilən nöqtəsini hədəfə almağa imkan verir.

“2025-ci ilin oktyabr ayına olan məlumata görə, bu tip raketdən cəmi 23 dəfə istifadə edilib. Ukrayna kəşfiyyatının məlumatına əsasən, ötən ilin noyabrında Rusiyanın cəmi təxminən 50 ədəd 9M729 “Novator” raketi olub”, - nəşr vurğulayıb.

Bununla yanaşı, insayderlərin sözlərinə görə, Rusiya Müdafiə Nazirliyi 2025-ci ildə 95 ədəd belə qanadlı raket sifariş verib.