Avropa dövlətlərinin liderləri Brüsseldə keçirilən işgüzar şam yeməyində ABŞ Prezidenti Donald Trampın təhdid və təzyiqlərinə qarşı durmaq üçün bir plan hazırlayıblar.

Axar.az xəbər verir ki, bu barədə “Nyu York Tayms” qəzeti məlumat yayıb.

Planda ABŞ prezidentinin gələcək təxribatlarına soyuqqanlı reaksiya vermək və cavab kimi rüsumlar tətbiq etməklə hədələmək nəzərdə tutulub.

Bundan əlavə, onlar Vaşinqtondan hərbi və iqtisadi asılılığı azaltmağı planlaşdırıblar.

Mənbələrə görə, İtaliyanın Baş naziri Corciya Meloni görüşdə ABŞ prezidenti ilə dialoqun davam etdirilməsini təklif edib, Almaniya kansleri Fridrix Merz də ABŞ-dan iqtisadi asılılığı azaltmaq üçün sürətli tədbirlərin görülməsini istəyib. Fransa Prezidenti Emmanuel Makron isə Avropanın Vaşinqtona qarşı mübarizə aparmaq istəyini nümayiş etdirməli olduğunu və bununla da Trampın hörmətini qazanması gərəkdiyini bildirib.

Qəzet Avropa liderlərinin planını cəsarətli, ancaq kifayət qədər mücərrəd adlandırıb.