Bu həftə Çin üçün Rusiya neftinə tətbiq olunan endirimlər yeni rekorda çatıb. Buna ABŞ Prezidenti Donald Trampın Hindistanla ticarət sazişinin bağlanması ilə bağlı açıqlaması səbəb olub. Həmin saziş Yeni Dehlinin Rusiya neftinin idxalını dayandırmasını nəzərdə tutur.

Axar.az xəbər verir ki, bu barədə “Röyters” agentliyi mənbələrinə istinadən məlumat yayıb.

Mənbələrə görə, “ESPO Blend” markalı neftə tətbiq olunan endirim son aylarda 7–8 dollar olduğu halda, bu həftə demək olar ki, bir barrel üçün 9 dollara yüksəlib. Eyni zamanda, Baltik limanlarından Hindistana ixrac edilən və Rusiyanın ən populyar nefti sayılan “Urals” markasına tətbiq olunan endirimin də artacağı proqnozlaşdırılır. Hazırda bu diskont bir barrel üçün 12 dollar təşkil edir.

“Vortexa” şirkətinin analitiki Emma Li qeyd edir ki, Hindistanın Rusiya neftindən imtina etməsi ehtimalı endirimlərin daha da artmasına gətirib çıxara bilər və bu da Çinin özəl neft emalı zavodlarını Rusiya neftinin idxalını artırmağa təşviq edəcək.

O əlavə edib ki, Çinin dövlətə məxsus neft emalı zavodları ABŞ-ın Rusiya istehsalçıları “Lukoyl” və “Rosneft”ə sanksiyalar tətbiq etdiyi oktyabr ayından bəri Rusiya neftinin alışını dayandırıblar.

Bununla belə, “JPMorqan” analitikləri hesab edirlər ki, ABŞ-la ticarət sazişi bağlansa belə, Hindistan Rusiya neftindən tamamilə imtina etməyəcək:

“Əsas ssenari ondan ibarətdir ki, ticarət sazişindən sonra Hindistan gündəlik 800 min – 1 milyon barrel həcmində Rusiya nefti idxal edəcək”.