Son onilliklərdə bütün əlaqələrimiz pozulur.

Axar.az xəbər verir ki, bu sözləri Yaxın Şərq İnstitutunun prezidenti Yevgeni Satanovski yerli mediaya müsahibəsində deyib.

“İndi Venesuela ilə əlaqələrimiz necədir? Suriyadakı mövqeyimiz necədir? Heç bir şey yoxdur. Rusiyada qadağan olunmuş bir təşkilatın keçmiş lideri indi Vladimir Putinlə danışmaq üçün Moskvaya uçur (Suriya Prezidenti Əhməd Şaranın Moskvaya səfərini nəzərdə tutur - red.).

Əfqanıstanda mövqeyimiz necədir? Bu rejimi nəyə görəsə tanımağımız, Talibanı nəyə görəsə terrorçu siyahısından çıxarmağımız onların artıq belə olmadığı demək deyil. Məsələn, onlar Əfqanıstanda yenicə köləliyi - qul statusunu tətbiq etdilər. Mən hətta onların qadınlara qarşı qanunlardan danışmıram.

Əlaqələrimiz və mövqelərimiz haqqında danışarkən, yumşaq desək, özümüzü aldadırıq, çünki onları qoruyub saxlaya bilmirik. Hətta Orta Asiyada və Qafqazda da öz mövqeyimizi qoruya bilməmişik; Qazaxıstandakı mövqeyimiz virtual reallıqdır.

Rusiya öz mövqeyini qurmaq üçün 350 il sərf etdi və indi həmin 350 illik tarix zibil qutusuna atılıb. Və biz Tehran üçün narahat olacağıq... Niyə narahat olmalıyıq?”, - deyə Satanovski qeyd edib.