Yaxın Şərqdə hava hücumundan müdafiə sistemlərinin effektivliyi ilə bağlı ciddi suallar yaranıb.

Axar.az Musavat.com-a istinadla xəbər verir ki, son hücumlar fonunda həm ABŞ istehsalı “Patriot PAC-3” komplekslərinin, həm də İsrailin “Davudun Sapandı” (David’s Sling) sisteminin İranın yeni nəsil raketləri qarşısında çətinlik yaşadığı iddia olunur.

Hərbi mənbələrin yaydığı məlumatlara görə, “Patriot” sistemi “döyüş” əmri verildikdən sonra hədəfin trayektoriyasını avtomatik hesablayaraq buraxılış edir. Lakin bəzi hallarda sistemin bahalı raketləri daha ucuz hədəflərə – xüsusilə “Şahid” tipli pilotsuz uçuş aparatlarına qarşı istifadə etməsi onun iqtisadi baxımdan səmərəliliyini sual altına alır.

Eyni zamanda, İranın son hücumlarda daha mürəkkəb və manevr edə bilən sursatlardan istifadə etdiyi bildirilir. Xüsusilə Qətərdəki Ras-Laffan qaz kompleksinə zərbələr zamanı bu tip silahların tətbiqi onların mövcud hava hücumundan müdafiə sistemlərini yan keçmək qabiliyyətinə malik olduğunu göstərir.

İsraildə isə Arad və Dimona istiqamətində atılan ballistik raketlərin qarşısının alınmasında problemlər yaşandığı barədə məlumatlar yayılıb. Bəzi mənbələr bu uğursuzluğu “Davudun Sapandı” sisteminin effektiv işləməməsi ilə əlaqələndirsə də, məsələ ilə bağlı rəsmi və tam texniki açıqlama hələ verilməyib.