ABŞ və İsrailin hücumlarına baxmayaraq, İranın raket buraxılışlarının təxminən yarısı və minlərlə dron hələ də işlək vəziyyətdədir.

Axar.az xəbər verir ki, bu barədə CNN telekanalı ABŞ kəşfiyyatına yaxın mənbələrə istinadla məlumat yayıb.

“Son kəşfiyyat qiymətləndirmələrinə əsasən, İranın raket buraxılış qurğularının təxminən yarısı salamat qalıb. Son 5 həftə ərzində ABŞ və İsrail tərəfindən hərbi hədəflərə gündəlik zərbələr endirilməsinə baxmayaraq, İranın arsenalında minlərlə kamikadze dron qalır”, - deyə telekanal bildirir.

Qeyd olunub ki, ABŞ kəşfiyyatının hesablamalarına hazırda əlçatmaz olan buraxılış qurğuları da daxil edilə bilər:

“Bunlara, məsələn, zərbələr nəticəsində torpaq altında qalan, lakin tam məhv edilməmiş sistemlər aiddir”.

Mənbələrin sözlərinə görə, ölkənin ümumi pilotsuz uçuş aparatı potensialının təxminən 50 faizini təşkil edən minlərlə dron hələ də mövcuddur:

“Son günlərdə toplanmış kəşfiyyat məlumatlarına əsasən, İranın sahil müdafiəsi üçün nəzərdə tutulmuş kruiz raketlərinin əksəriyyəti də salamat qalıb”.

CNN bildirib ki, bu raketlər İrana Hörmüz boğazı ərazisində gəmiçiliyi təhdid etmək imkanı verir.

Qeyd edək ki, daha əvvəl ABŞ Prezidenti Donald Tramp hərbi əməliyyatın başlanğıcından bəri ABŞ-İsrail zərbələri nəticəsində İranın raket və pilotsuz uçuş aparatlarının buraxılış imkanlarının “əhəmiyyətli dərəcədə azaldığını” bildirmişdi.