İsrailin müvəqqəti işlər vəkili Daniela Qrudski Ekşteyn Böyük Britaniya Xarici İşlər Nazirliyinə çağırılıb.

Axar.az xəbər verir ki, bu barədə XİN-in mətbuat xidmətindən bildirilib.

"Çağırış Böyük Britaniyanın İsrailin milli təhlükəsizlik naziri İtamar Ben-Qvirin davranışını - Sumud donanmasının iştirakçılarını təhqir etməsini qətiyyətlə pisləməsi ilə bağlıdır. Bu cür davranış hörmət və insan ləyaqətinin ən əsas normalarının pozulmasıdır", - bəyanatda deyilir.

XİN həmin şəxslərin saxlanma şəraitindən dərin narahatlığını ifadə edib və İsrail hakimiyyətindən izahat tələb edib:

"Donanmanın humanitar yardım çatdırmaq cəhdi Qəzza zolağındakı vəziyyətin ciddiliyini nümayiş etdirir. İsrail quru marşrutları ilə daha çox həcmdə yardımın təhlükəsiz şəkildə çatdırılmasını təmin etməlidir. Biz bu missiyada iştirak edən Britaniyanın bir neçə vətəndaşının ailələri ilə əlaqə saxlayırıq və istənilən vaxt konsulluq dəstəyi göstərməyə hazırıq".

Qeyd edək ki, İsrail Hərbi Dəniz Qüvvələri humanitar yardımla Qəzzaya gedən Sumud donanmasına aid gəmiləri əməliyyat nəticəsində saxlayıb. Daha sonra təhlükəsizlik naziri Ben-Qvir saxlanılan fəalların təhqir edilməsini əks etdirən görüntülər paylaşıb.