İranda ABŞ-la danışıqlarda mümkün razılaşmaya doğru irəliləyişə baxmayaraq, sərt mühafizəkarlar qrupunun danışıqları pozmaq cəhdləri fonunda daxili təzyiqlər artıb.

Axar.az xəbər verir ki, bu barədə “Nyu York Tayms” nəşri məlumat yayıb.

Qəzetin məlumatına görə, bu qrupun parlamentdə, dövlət mediasında və Milli Təhlükəsizlik Şurasında təmsil olunan üzvləri Vaşinqtona güzəştlərə qarşı çıxır və mitinqlər, media kampaniyaları, eyni zamanda siyasi bəyanatlar vasitəsilə ictimai təzyiq göstərirlər.

Nəşr qeyd edib ki, İran rəhbərliyi ümumilikdə danışıqlar prosesini dəstəkləyir.

Mənbələrin məlumatına görə, Prezident Məsud Pezeşkian dövlət televiziyasını danışıqları uğursuz kimi təqdim etdiyinə və daxili fikir ayrılıqlarını dərinləşdirdiyinə görə tənqid edib.

Bildirilib ki, İranın danışıqlar qrupu daxili ziddiyyətlərə baxmayaraq, ABŞ-la təmasları davam etdirir.

Nəşrin istinad etdiyi analitiklərin fikrincə, sərt xətt tərəfdarları azlıq təşkil etsələr də, hakimiyyətin bəzi strukturlarında və İslam Respublikasının tərəfdarlarının bir hissəsi arasında təsirlərini qoruyub saxlayırlar.