İranla döyüşlərin ən azı bir neçə gün davam edəcəyini gözləyirik, hətta müharibənin yenidən tam şəkildə başlaması ehtimalı da var.

Axar.az xəbər verir ki, bu barədə İsrail Müdafiə Qüvvələri (ÇAXAL) açıqlama yayıb.

Bildirilib ki, gecədən bəri indiyədək İran İsrailə ən azı 20 ballistik raket atıb: “Bu raketlər ya zərərsizləşdirilib, ya da açıq ərazilərə düşüb”.

Bundan əlavə, İranın dəstəklədiyi Yəməndəki husilər bu səhər İsrailə iki ballistik raket atıblar. Məlumata görə, raketlərdən biri vurularaq məhv edilib, digəri isə ölkəyə çatmayıb.

İsrail bu hücumlara cavab olaraq indiyədək İrana qarşı iki hava zərbələri dalğası həyata keçirib.

ÇAXAL-ın məlumatına görə, zərbələr yalnız İsrail tərəfindən həyata keçirilir, lakin ABŞ Mərkəzi Komandanlığı - CENTCOM ilə tam koordinasiya mövcuddur. ABŞ hərbçilərinin də İranın İsrailə atdığı raketlərin zərərsizləşdirilməsində iştirak etdiyi bildirilir.

Eyni zamanda, vurğulanıb ki, ÇAXAL-ın Baş Qərargah rəisi general-leytenant Eyal Zamir CENTCOM rəhbəri admiral Bred Kuperlə üç dəfə telefon danışığı aparıb.

Qeyd edək ki, daha əvvəl “Axios” nəşri ABŞ Silahlı Qüvvələrinin İsrailin İran ərazisinə endirdiyi cavab zərbələrində iştirak etmədiyini bildirib.