ABŞ Prezidenti Donald Tramp DÇ-2026-nın yarımfinalında İngiltərənin Argentinaya uduzduğu oyundan sonra Tomas Tuxelin taktikasını tənqid edib.

Axar.az Qol.az-a istinadən xəbər verir ki, Tramp bu barədə Nyu Yorkda FİFA prezidenti Canni İnfantino ilə birgə çıxışı zamanı danışıb.

“İngiltərənin Harri Keyn kimi çox yaxşı futbolçusu var. Düşünürəm ki, onu müdafiəçi kimi oynatmaqla səhv etdilər. Mən futboldan nə başa düşürəm ki? Amma ən yaxşı futbolçularını müdafiəyə göndərdilər”, - Tramp bildirib.

Xatırladaq ki, İngiltərə yarımfinalda Entoni Qordonun qolu ilə hesabı açsa da, daha sonra üstünlüyünü qoruya bilməyib. Tomas Tuxel ikinci hissədə müdafiəni gücləndirmək üçün bir neçə dəyişiklik edib və komandanı beş müdafiəçi ilə oynatmağa başlayıb.

Buna baxmayaraq Argentina əvvəlcə Entso Fernandesin qolu ilə hesabı bərabərləşdirib, daha sonra Lautaro Martinesin dəqiq zərbəsi ilə 2:1 hesablı qələbə qazanaraq finala yüksəlib.

Oyundan sonra Tuxel məğlubiyyətə görə məsuliyyəti öz üzərinə götürsə də, etdiyi dəyişikliklərdən peşman olmadığını bildirib. Almaniyalı mütəxəssis qərarlarını təcrübəsinə və instinktinə əsaslanaraq verdiyini deyib.

Qeyd edək ki, Argentina iyulun 19-da keçiriləcək finalda İspaniya ilə qarşılaşacaq. İngiltərə isə üçüncü yer uğrunda oyunda Fransa ilə üz-üzə gələcək.