ABŞ-ın kosmik və müdafiə şirkəti “Redwire” Ukraynaya 300-dən çox “Pinqvin” kəşfiyyat pilotsuz uçuş aparatı (PUA) tədarük edib.

Axar.az xəbər verir ki, bu barədə “Defence Blog” yazıb.

Qeyd olunur ki, yeni versiya 2022-ci ildə istifadə olunan aparatlarla müqayisədə daha yüksək hündürlüyə qalxa bilir. Bu imkanlar kəşfiyyat dronlarını işğalçı qüvvələrin zərbə PUA-larına qarşı daha dayanıqlı edir.

“Pinqvin” kiçik, sabit qanadlı pilotsuz uçuş aparatıdır. O, kəşfiyyat, müşahidə və ərazinin araşdırılması üçün nəzərdə tutulub. Ukrayna Müdafiə Qüvvələri modernləşdirilmiş “Pinqvin Mk2X” versiyasını əldə edib. Bu model davamlılığı, daha uzağa və digər analoji aparatlardan daha yüksək hündürlüyə uça bilməsi ilə seçilir. “Redwire” uçuşun dəqiq hündürlüyü və məsafəsi barədə məlumat açıqlamayıb.

PUA-nın üzərində “Redwire” şirkətinin Latviyadakı filialı tərəfindən istehsal olunan “Octopus 180” sabitləşdirilmiş kamera quraşdırılıb. Bu kamera operatorlara hədəfləri daha uzaq məsafədən və daha dəqiq şəkildə müşahidə etməyə imkan verir.