Əgər Makedoniya Prezidenti Georgi İvanov 10 gün ərzində parlament çoxluğuna hökuməti formalaşdırmaq üçün mandat verməsə, cinayət törədəcək.

Axar.az xəbər verir ki, bunu Xorvatiya mətbuatına müsahibəsində Makedoniya İnteqrasiya Naminə Demokratik İttifaq Partiyasının sədri Tələt Cəfəri söyləyib. O, prezidentin parlament çoxluğuna mandat verməyə məcbur olduğunu bildirib:

“Prezident mandat verməsə, onu impiçment gözləyir. Bunun üçün parlamentin üçdə ikisinin səsi lazımdır, amma hələlik bu yoxdur”.

Qeyd edək ki, Tələt Cəfəri bundan öncə parlamentin sədri seçilib. Lakin sonradan parlament İvanov tərəfdarlarının hücumuna məruz qalıb.

Makedoniyada siyasi böhran keçən ilin dekabrından davam edir. İndiyə qədər ölkədə hökumətin qurulmasına izn verilməyib. Bunun səbəbi isə prezidentin Sosial Demokrat Partiya ilə alban partiyalarının birləşməsinin əleyhdarı olmasıdır. İvanov məhz bu koalisiyanın ölkədə Konstitusiya dəyişiklikləri edəcəyini və albanlara daha çox haqq verəcəyini iddia edir.