Ermənistan qanuni oğru Ruben Tatulyana diplomatik pasport verdiyini təsdiqləyib.

Axar.az xəbər verir ki, bu barədə informasiyanı Ermənistan Xarici İşlər Nazirliyinin mətbuat katibi Tiqran Balayan yayıb. O, Ermənistana investisiya cəlbi və iqtisadi inkişafa yardımına görə Tatulyana diplomatik pasport verildiyini bildirib.

Qeyd edək ki, Tatulya mayın 14-də Çexiyada həbs edilib. Onun həbsinə səbəb qanuni oğruların “sxodka”sında iştirakı olub. Tatulyan bu “sxodka”nı özü maliyyələşdirib. Axtarış zamanı Ded Xasan klanına mənsub Tatulyanın üzərindən Ermənistanın diplomatik pasportu tapılıb.

Tatulyan çoxdan Ermənistan hökumət nümayəndələri ilə əlaqədədir. O, Prezident Serj Sərkisyan və Baş nazir Karen Karapetyanla şəxsən tanışdır. Hətta qanuni oğru Karapetyanın yaratdığı Ermənistan İnvestorlar Klubunun üzvüdür. Soçidə yaşayan Tatulyan həmçinin diplomatik nömrə nişanı olan avtomobildən istifadə edir. Bunu isə ona Ermənistanın Rusiyadakı səfirliyi verib.