Suriyada 3 namizədin qatıldığı prezident seçkisinə start verilib.

Axar.az xəbər verir ki, bu gün səhər saatlarından başlanan seçki yalnız Bəşər Əsədin nəzarətində olan bölgələrdə keçirilir. Bəşər Əsəd, keçmiş siyasətçi Mahir Əbdülhafiz Həccar və keçmiş nazir Həsən Abdullah Ən-Nurinin qatıldığı seçki prosesi bu gün və sabah davam edəcək. Yerli vaxtla səhər 4-dən başlanan seçkinin axşam saat 17-dək davam etməsi gözlənilir.

Qeyd edək ki, hazırki Suriya rejimi ölkə tarixində ilk demokratik seçki olduğunu, ilk dəfə bir neçə namizədin seçkilərə qatıldığını bildirib. Müxalifət isə bu seçkiləri "qanlı seçki" və "axmaqlıq" adlandırıb.

Verilən ən son məlumatlara görə, seçkidə fəallıq son dərəcə aşağıdır. Demək olar ki, əhali seçkidə iştirak etmir. Beynəlxalq müşahidəçilərin seçkilərə qatılmaması, seçki kompaniyalarının keçirilməməsi nəticəsində ölkədə seçki ab-havası yoxdur.

Onu da bildirək ki, Suriya Daxili İşlər naziri, seçkilərdə 15 milyon seçicinin 9601 seçki məntəqəsində səs verəcəyini açıqlamışdı.