Məşhur holland filoloqu və tərcüməçisi Hans Boland Rusiya Prezidenti Vladimir Putinin siyasətinə etiraz əlaməti olaraq Puşkin adına mükafatdan imtina edib.

Axar.az rus mediasına istinadən xəbər verir ki, Boland avqust ayında Rusiya səfirliyinin mədəniyyət üzrə attaşesi Fyodr Voronindən noyabrın 4-də Xalq birliyi günü münasibətilə Kremldə keçiriləcək Puşkin adına mükafatın təqdimat mərasiminə dəvət alıb. Mükafatları Putin şəxsən özü təqdim edəcək.

Tərcüməçi dəvətə rədd cavabı verib və öz qərarını yazdığı məktubda belə izah edib: "Sonsuz ehtiram bəslədiyim Anna Axmetovanın qızğın apostolu olaraq – daha münasib və doğru söz tapa bilmədim – həqiqət tələb etdiyi an möhkəm olmalıyam. Əgər davranış və düşüncələrinə nifrət etdiyim prezidentiniz olmasaydı, mən çox böyük məmnuniyyətlə göstərilən şərəfi qəbul edərdim. O, planetimizin sülh və azadlığı üçün çox böyük təhlükədir. Allah eləsin ki, onun "ideyaları" ən yaxın günlərdə tamamilə puç olsun. Onunla mənim aramda, onun adı ilə Puşkinin adı arasında istənilən əlaqə mənim üçün dözülməz və ikrah doğurucudur".

Qeyd edək ki, sitat "Novaya qazeta"dan gətirilib.

Voronin bildirir ki, Boland şəxsi məktubunun yayımlanması üçün icazə istəməyib və onu nəşr etdirmək barədə səfirliyə xəbərdarlıq da etməyib.

Xatırladaq ki, Bolandın tərcüməsində Aleksandr Puşkin, Mixail Lermontov, Anna Axmetova, Nikolay Qümilyovun şeirləri, eləcə də Fyodr Dostoyevskinin "Cinlər" romanı, İvan Krılov, Osip Mandelştam, Varlam Şalamov, Venedikt Yerofeyev və Vladimir Nabokovun əsərləri niderland dilində nəşr olunub. Bolan Amsterdam universitetində dərs deyir.

Puşkin adına mükafat isə 1969-cu ildən Rusiya Elmlər Akademiyası (əvvəllər SSRİ Elmlər Akademiyası) tərəfindən ədəbi tənqid, nəzəriyyə və ədəbiyyat tarixi sahəsindəki görkəmli elmi əsərlərə verilir.