"Milat" qəzetinin yazarı Əhməd Ay İŞİD düşərgəsində olub, reportaj hazırlayıb.

Axar.az xəbər verir ki, onun gözləri bağlı şəkildə sərhəddən kənar yerə aparıblar. Jurnalist qeyd edib ki, müsahibə aldığı dörd terrorçudan biri Amerika, biri isə Türkiyə vətəndaşı olub, digər iki silahlı isə ərəbcə danışıb.

Türkiyə mediası isə Ə.Aya irad tutub ki, niyə 49 diplomatın nəyin qarşılığında azad edildiyini İŞİD üzvlərindən soruşmayıb.

"Allah yer üzündə xilafət dövləti yaratmağımızı əmr edib. Buna qarşı çıxan hər kəs rəzil şəkildə öldürüləcək,"- deyə İŞİD-çi bildirib.

- Allah eşqinə, dərdiniz nədir? Türkmanları, kürdləri, yezidləri, amerikalıları öldürürsünüz, nə etmək istəyirsiniz?

- Biz Allah yolunda savaşırıq və şəhid olana qədər savaşacağıq.

- Yaxşı, Allah üçün günahsız adamları öldürmək, qadınları qənimət götürmək Allah yolunda olmaqdırmı?

- İslam fiqhi bu məsələdə dəqiqdir. Allah dövlət yaratmağı əmr edib. Həqiqi müsəlmanlar əsla bizdən qorxmazlar. Müsəlman olan bizimlə bərabər olar. Kim cənnət istəyirsə, bizimlədir.

İŞİD-çilər qeyd edib ki, Türkiyə ABŞ-ın istədiyini edir:

"Türkiyə bizdən qorxur. Əgər girovlar olmasaydı, peşmərgə ilə birlikdə çoxdan bizə qarşı hücum etmişdi".