İngiltərə Müdafiə naziri Maykl Fellon Böyük Britaniya hərbi qüvvələrinin Əfqanıstanı tərk etdiyini açıqlayıb.

Axar.az xəbər verir ki, son hərbi bazanı Əfqanıstana təhvil verdiklərini deyən Fellon bu ölkədə vəzifələrinin başa çatdığını bildirib:

"Taliban tam olaraq məğlub edilmədi. Ancaq bu gündən etibarən təhlükəsizliyi təmin etmək üçün bütün məsuliyyət əfqan qüvvələrində olacaq".

General 2001-ci ildən bəri Əfqanıstanda bir sıra səhvlərə yol verildiyini etiraf etsə də, bir çox uğurlara da imza atdıqlarını dilə gətirib.

Generalın bu açıqlamasından sonra İngiltərənin 2006-ci ildən bəri Əfqanıstanın Helmand vilayətində yerləşən bazasında dalğalandırdığı bayraq endirilib.

Xatırladaq ki, 2001-ci ildən Əfqanıstanda əməliyyatlara qoşulan Böyük Britaniya qüvvələri 453 əsgərini itirib. 13 ildə 140 min ingilis əsgərinin xidmət etdiyi bu ölkə üçün Birləşmiş Krallıq 19 milyard funt-sterlinq xərcləyib.