Əlcəzairin Baş Qərargah rəisi Qaed Salah Birləşmiş Ərəb Əmirliyindən əmr alıb və ölkədə Prezident Əbdüləziz Buteflikaya qarşı nümayiş keçirənləri qorxuya salıb.

Axar.az xəbər verir ki, bu barədə danışan ölkə ordusunun keçmiş rəhbərlərindən Hüseyn bin Xadid qərargah rəisinin Əlcəzairdə vəziyyəti ağırlaşdırmağa çalışdığını bildirib.

"Salah və Butefikanın qardaşı prezidentin sağlamlıq durumunun ağır olmasından istifadə edir. Bu iki şəxs 2005-ci ildən ölkəni idarə edir. Salah ölkəni tam idarə etmək üçün Butefikanın ölümünü gözləyir", - Xadid söyləyib.

Sözügedən iddiaya münasibət bildirən Qaed xaricdən sifariş almadığını və hazırda Əlcəzairdə heç bir xarici qüvvənin olmadığını vurğulayıb.

Qeyd edək ki, İsveçrənin Cenevrə şəhərində müalicə alan Əlcəzair Prezidenti Əbdüləziz Buteflikanın vəziyyəti kritikdir.