"Azərpoçt"da kommunal xərclərin ödənməsi zamanı ciddi sistem narahatlığı yaşanır.

Belə bir halla qarşılaşan abunəçinin Axar.az-a verdiyi məlumata görə, Bakı Elektrikşəbəkədən aldığı bildiriş əsasında ötən ay üçün olan borcu ödəmək istəyib və qəribə mənzərə ilə üzləşib. Məlum olub ki, onun heç də bu qədər borcu yoxmuş. "Azərpoçt" operatoru ona daha "münasib" – iki ay öncə, havaların isti keçdoiyi zamanda borclandığı az məbləği göstərib və yeni borcunun yalnız bundan ibarət olduğunu bildirib.

Bakı Elektrikşəbəkənin bildirişi ilə "Azərpoçt"un təsdiq etdiyi borc müqayisə edildikdə bəlli olub ki, "Azərpoçt" kompüter sistemində ötən ay deyil, iki ay öncənin borcu görsənir: abonentin həmin borcu artıq 37 gündür ödəməsi, üstəlik yeni borcunun yaranması ümumiyyətlə görünmür.

Abunəçini narahat edənsə ayrı məsələdir: əgər mövcud borc və ödənişlər vaxtlı-vaxtında "Azərpoçt"un sistemində görünmürsə, demək, Bakı Elektrikşəbəkə ödənişi gecikdirən abonentin işığını istənilən vaxt kəsmək hüququ qazanır. Başqa sözlə desək, abonentin heç bir günahı olmadan işıqsız qalmaq riski yaranır.

Ödənişlər və borclanmalar 40 günə yaxın müddətdə "Azərpoçt" məntəqələrinin sistemində niyə görünmür və bu problemin səbəbi nədir? İki qurum arasında "sistem anlaşılmazlığının" cəzasını abonent çəkməyəcək ki?

Bakı Elektrikşəbəkənin mətbuat xidmətinin rəhbəri Tanrıverdi Mustafayev Axar.az-a bildirdi ki, bu problem "Azərpoçt"la bağlıdır:

"Belə hallar çox nadir hallarda baş verir. Ola bilər ki, ödəniş bazar gününə düşdüyündən sistemə yerləşdirilməyib".

T.Mustafayev sistemdə görünməməsinə baxmayaraq, ödənişlərin dərhal Bakı Eletrikşəbəkədə qeydə alındığını və öz sistemlərinin mükəmməl işlədiyini də qeyd etdi:

"Ona görə nadir hallarda da olsa, belə problemlə qarşılaşan abonentlərdən xahiş edirik ki, Bakı Elektrikşəbəkənin xəbərdarlıq bildirişi əsasında ödənişlər həyata keçirsinlər".

T.Mustafayev dediklərinin sübutu kimi şikayətçi abonentin kodunu götürərək dərhal yoxlanma da apardı və artıq sistemdə yenilənmə olduğunu təsdiqlədi:

"Bildiriş əsasında ödəniş edən abonent əmin ola bilər ki, onun işığı anlaşılmazlığın nəticəsi olaraq kəsilməyəcək. Bu problem abonentə təsir etmir, "Azərpoçt" sistemindədir".