Yaponiya qarşıdakı 3 ildə Cənub-Şərqi Asiya ölkələrində (ASEAN) infrastrukturun inkişafına 3 milyard dollar ayıracaq.

Axar.az xəbər verir ki, bu barədə Yaponiyanın Xarici İşlər naziri Toşimitsu Moteqi dekabrın 2-də keçirilən mətbuat konfransı zamanı deyib. O bildirib ki, Yaponiya hökuməti 2020-2022-ci illərdə fərdi sektor daxil olmaqla investisiyaların ayrılmasını planlaşdırır.

Nazir əlavə edib ki, bu plan Yaponiyanın ASEAN blokunun üzvü olan bütün ölkələrin yeni iqtisadi imkanlardan bəhrələnməklə azad və ədalətli inkişafına dəstək verməyə çalışdığını təsdiq edir.

Xatırladaq ki, ötən ay Baş Nazir Şinzo Abe ASEAN ölkələrinin liderlərinə Yaponiyanın bu assosiasiyaya JİKA vasitəsilə investisiyaların ayrılmasını artırmağı planlaşdırdığını bildirib. Ş.Abe deyib ki, bu investisiyalar Hind-Sakit okean regionunun azad və açıq inkişafına yönəlib, burada infrastrukturun təkmilləşdirilməsinə, müxtəlif təşəbbüslərin reallaşmasına, o cümlədən qadınların imkanlarının genişləndirilməsinə xidmət edəcək.