ABŞ audit üzrə beynəlxalq konfransda iştirak etməli olan Rusiya nümayəndə heyətinə viza verməyib.

Axar.az xəbər verir ki, bu məlumatı Rusiyanın Vaşinqton səfirliyi yayıb.

“Audit üzrə beynəlxalq konfransda iştirak etmək üçün 3 dekabrda Vaşinqtona səfər etməli olan Rusiya Federal Xəzinədarlığının nümayəndə heyətinə viza verilməyib”, - deyə səfirliyin rəsmi saytında qeyd edilib.

Həmçinin, səfirlik qeyd edib ki, ABŞ Dövlət departamenti Rusiya XİN-in xaricdə yaşayan rusiyalılarla iş üzrə departamentinin direktoru Oleq Malginovun Nyu Yorka səfərinə də mane olub. O, 28-29 noyabr tarixlərində Gənclər Forumunda iştirak etməli idi.

Xatırladaq ki, noyabrda ABŞ Moskvanın “Spartak” futbol klubunun oyunçularına, oktyabrda isə BMT-nin Baş Assambleyasındakı rus nümayəndə heyətinə 18 vizanın verilməsindən imtina etmişdi.