Ermənistandakı biolaboratoriyalar Ermənistana məxsusdur və ona dövlət strukturları tərəfindən tam nəzarət edilir.

Axar.az xəbər verir ki, bu məlumatı Ermənistan Xarici İşlər Nazirliyi yayıb.

“Erməni tərəfi dəfələrlə bəyan edib ki, laboratoriyanın personalı yalnız Ermənistan vətəndaşlarından ibarətdir. Xarici mütəxəssislərin laboratoriyada mövcudluğu istisna edilir. Rusiya ilə danışıqlara gəlincə, burada söhbət “Bioloji təhlükəsizliyin təminatı məsələləri” memorandumundan gedir. Sənəd iki ölkənin bioloji təhlükəsizlik məsələləri spektrində əməkdaşlığı ehtiva edir. Hazırkı memorandum layihəsi hansısa tərəfə laboratoriyaya giriş və ya burada birtərəfli nəzarət aparmaq haqqı vermir. Hazırda layihə dövlətdaxili razılaşma mərhələsindədir”, – deyə bəyanatda bildirilib.

Qeyd edək ki, keçən ilin noyabrında Rusiya Xarici İşlər naziri Sergey Lavrov İrəvanda səfərdə olarkən Ermənistandakı biolaboratoriyalara rusiyalı mütəxəssislərin buraxılması barədə memorandumla bağlı danışıqların bitdiyini açıqlamış, amma İrəvanda tərəflər arasında sənəd imzalanmamışdı.