Nefteyuqansk şəhər xəstəxanasında uzun illərdir çalışan azərbaycanlı həkim Kamil Nəzərov haqda hazırda bütün Krım danışır.

Axar.az xəbər verir ki, onun bir qızı ölümün pəncəsindən xilas etməsi möcüzə kimi qiymətləndirilir.

Hadisə avqustun 6-da baş verib. Krımda çimərliklərin birində dənizdə boğulan gənc qız son anda xilas edilib, sahilə çıxarılıb. Lakin 3 dəqiqə qaldığından sahilə çıxarılarkən qızın nəfəsi olmayıb, həmçinin nəbzi də vurmayıb.

Bu zaman həmin çimərlikdə ailəsi ilə istirahət edən Kamil Nəzərov hay-küyə olay yerinə gəlib. Nəfəsi kəsilmiş qıza dərhal tibbi-reanimasion yardım göstərməyə başlayıb.

“Mən ona yaxınlaşıb baxanda tənəffüs və nəbzi yox idi. Təcili yardım gələnə kimi o, artıq öləcəkdi. İnsanlar artıq gec olduğunu deyirdilər. Amma mən 15 dəqiqə ağciyər-ürək reanimasion yardımı göstərdim.

15 dəqiqədən sonra ilk tənəffüs baş verdi. Bu möcüzə idi.

O vaxta kimi təcili yardım gəldi və mən xəstəni onlara təhvil verdim”, - K.Nəzərov qeyd edib.

Kamil Nəzərovun yüksək peşəkarlığı və humanistliyi yerli mətbuat və sosial şəbəkələrin mövzusuna çevrilib və hamı ona təşəkkürünü bildirib.

Qeyd edək ki, Kamil Nəzərov 1998-ci ildən Rusiya Federasiyasının Tümen vilayətinin Neftyuqansk şəhərindəki V.İ.Yaçkiv adına Vilayət Klinik xəstəxanasının anesteziologiya və reanimasiya şöbəsində həkim-anestezialoq, reanimatoloq işləyir.