Türkiyənin İqtisadiyyat nazirinin müavini Adnan Yıldırım 1915-ci il hadisələrini "soyqırım" adlandıran Papa Fransiskə sürpriz dəvət göndərib.

Axar.az xəbər verir ki, Expo-2015 sərgisində iştirak üçün Türkiyənin virtual səyahət təklifinə Vatikan da öz növbəsində "yox" deməyib.

Jurnalistlərin suallarını cavablandıran Yıldırım Papanın "soyqırım" açıqlamasına münasibət bildirərək bu sözlərin Vatikanı sevindirmədiyini deyib:

"Gözləmədiyimiz bir açıqlama ilə qarşılaşdıq. Həqiqətən gözləmirdik. Deyilən sözlərin Vatikanı xoşbəxt etdiyini düşünmürəm. Hörmətli Papa belə bir açıqlama verdi, amma ümid edirəm ki, bunu kompensasiya edəcəklər. Papanı keçiriləcək sərgiyə dəvət edirik. Özü gələ bilmirsə, bir heyət göndərsin. Türkiyəni, mədəniyyətimizi, dünya sülhünə verdiyimiz töhfələri görsünlər".

Nazir müavininin bu sözlərindən sonra Vatikan da cavabını çox gözlətməyib. Cırtdan dövlətin Expo-2015 komissarı və eyni zamanda Papalıq Mədəniyyət Şurasının sədri Kardinal Qianfranko Ravasi verdiyi açıqlamada dəvətin qəbul edildiyini deyib:

"Türk nazir müavininin açıqlamasını maraqla oxudum. Vatikan heyəti Expo boyunca keçiriləcək bəzi sərgilərə qatılacaq. Açılışın ardından heyətimiz Türkiyənin dəvətini məmnuniyyətlə qəbul edir. Biz də Türkiyə heyətini sərginin Vatikan bölməsində gözləyirik".

Bildirək ki, İtaliya mətbuatı bu dəvətin arxasında Türkiyənin Vatikana qarşı "buzları əritmək" məqsədi olduğunu iddia edir.

Xatırladaq ki, İtaliyanın Milan şəhərində Beynəlxalq Sərgilər Bürosunun dəstəyi ilə Expo-2015 sərgisi keçiriləcək.