Çin Honkonqun qanunverici sistemində reformlara getmək istədiyini açıqlayıb.

Axar.az xəbər verir ki, bunu Ümumçin Xalq Nümayəndələri Məclisinin Daimi Komitəsi sədrinin müavini Van Çen deyib.

“Biz seçicilər komissiyasının formalaşdırma nizamını və səlahiyyətlərini gücləndirməyə hazırlaşırıq. Reform antiçin qüvvələrin Honkonqda hakimiyyəti ələ keçirmə risklərinin ortadan qaldırılması üçün vacibdir. Honkonqu honkonqluların idarə etməsini, bir ölkə, iki sistem prinsipinin reallaşdırılmasını zəmanət altına almaq lazımdır”, – deyə o bildirib.

Çinin bu bəyanatına Avropa Birliyi və ABŞ qarşı çıxıb. AB-nin Xarici Siyasət Xidməti bu islahatların neqativ siyasi və iqtisadi nəticələrə gətirib çıxaracağını bildirib. ABŞ isə Çini Honkonqda beynəlxalq öhdəliklərini icra etməyə çağırıb. Vaşinqton Honkonqda seçki islahatının bölgənin muxtariyyətinə hücum olduğunu deyib.