"Suriya Prezidenti Bəşər Əsəd qatil İran rejiminin köməyi ilə hər gün öz xalqını öldürür. İsrail isə HƏMAS kimi günahsız insanlara hücum edən terror təşkilatı ilə savaşır".

Axar.az xəbər verir ki, bu açıqlama ilə İsrail Baş naziri Benyamin Netanyahu çıxış edib. O, Qəzzaya humanitar yardım daşıyan və İsrail tərəfindən saxlanılan "Azadlıq donanması"nın fəallarına məktub göndərib:

"Çox güman ki, yolunuzu azmısınız. İsrailə xoş gəldiniz. Yəqin ki, bura yox, Suriyaya getmək niyyətindəydiniz. Çünki Suriya Prezidenti Bəşər Əsəd qatil İran rejiminin köməyi ilə hər gün öz xalqını öldürür. İsrail isə HƏMAS kimi günahsız insanlara hücum edən terror təşkilatı ilə savaşır. Bu gün Qəzza mühasirədə deyil və İsrail vasitəsilə humanitar yardım çatdırmaqda sərbəstsiniz. Əgər insan hüquqları məsələsində həqiqətən narahat olsaydınız, Qəzzada insanları öldürən və uşaqlardan qalxan kimi istifadə edən terrorçu rejimi dəstəkləyib, yola çıxmazdınız".

Qeyd edək ki, bu gün səhər saatlarında Qəzzaya humanitar yardım daşıyan və 5 gəmidən ibarət olan "Azadlıq donanması" İsrail tərəfindən beynəlxalq sularda hücuma məruz qalıb.