Rusiya Cənubi Osetiyada beynəlxalq və milli hüquq prinsipləri çərçivəsində sərt, amma lazım olan addımı atdı.

Axar.az xəbər verir ki, bu barədə Feysbuk səhifəsində Rusiya Baş naziri Dmitri Medvedyev yazıb. O, 8 avqust hadisələrinin 7-ci ildönümündə önəmli etiraflar edib:

"Yeddi il əvvəl Gürcüstan ordusu ağır silahlar, tanklar və təyyarələrdən istifadə etməklə Tsxinvalidə ev, xəstəxana, məktəblərə qorxunc hücum reallaşdırdı. Yalnız bir neçə saat ərzində minlərlə insan, BMT çərçivəsində sülhü qorumaq üçün bölgədə xidmət keçən rus əsgərləri öldü. Bu insanların ölümü beynəlxalq hüququn ağır şəkildə pozulması və dəhşətli cinayət idi. Rusiya Cənubi Osetiyada beynəlxalq və milli hüquq prinsipləri çərçivəsində sərt, amma lazım olan addımı atdı. Rusiyanın əsas məqsədi insanların ölməsini və fəlakətin qarşısını almaq idi".

Medvedyev Rusiyanın Qafqazda daima sülhün qorunmasına çalışdığını bildirib:

"Rusiya hər zaman Qafqazda sülhün təmin edilməsinə çalışdı. Bu gün Abxaziya ilə Cənubi Osetiyada sabitliyin qorunmasına kömək edirik. Son zamanlardakı hadisələr qarşısında bir daha əmin oluruq ki, daxili qarşıdurmalar sülh yolu ilə həll edilməlidir".

Qeyd edək ki, Rusiya ilə Gürcüstan arasında savaş 2008-ci ilin avqustun 8-də başlamışdı. Müharibənin sonunda Cənubi Osetiya Gürcüstandan ayrılmış, bir müddət sonra isə Moskva Abxaziya və Cənubi Osetiyanın müstəqilliyini tanımışdı.