Rusiya özünün xarici siyasətində aktiv şəkildə mafiya və kriminal qüvvələrdən istifadə edir.

Axar.az xəbər verir ki, bu iddia ilə "Blumberq" agentliyi çıxış edib. Agentlik Kremlin bu qüvvələrdən yalnız rəsmi şəkildə müdaxilə edə bilmədiyi zonalarda istifadə olunduğunu bildirib:

"FTB və MKİ-nin məlumatlarına görə, Rusiya dünyanın ən təcrübəli kibercinayətkarlarının evinə çevrilib. Kreml onlarla çox sıx əlaqədədir. Moskva aktiv şəkildə öz diqqətini ABŞ, Avropa və Kanadadakı vacib infrastrukturlara yönəldib. Hətta bir müddət öncə "Kroudstrayk" şirkətinin həmtəsisçisi olan Dmitri Alperoviç çıxışı zamanı Rusiya xüsusi xidmət orqanlarının hakerlər ordusu yaratdığını bildirmişdi. Rusiyada texniki cəhətdən çox təcrübəli adam üzə çıxan kimi dərhal yox olur və hətta sonralar ondan heç bir informasiya almaq mümkün olmur. Moskva həmçinin Dnesteryanı, Abxaziya, Cənubi Osetiya və Donbas separatçılarının cinayət aləmindəki dəstəyinə güvənir. Rusiya 2003-cü ildə Gürcüstandakı "Qızılgül" və 2004-cü ildə Ukraynadakı "Narıncı" inqilabdan öncə hər iki ölkəni ələ keçirməyə cəhd edirdi. Korrupsiya və kölgə şəbəkələr həmin dövrdə artıq səfərbər edilmişdi. Əsas məqsəd Ukrayna hakimiyyətinin reformlar keçirməsinin qarşısını almaq idi. Onlar faktiki olaraq, bunu bacardılar. Cinayətkar vasitələrlə Kiyevi sərfəli olmayan qaz müqaviləsini imzalamağa məcbur etdilər. Nəticədə "Narıncı" inqilab çökdü və hakimiyyətə rusiyayönlü qüvvələr gəldi. Kreml indi bu hadisəni Ukraynanın şərqində yeni seçkilər keçirməklə təkrarlamağa çalışır. Donbasda keçiriləcək yerli seçkilərdə səhra komandirləri yox, 2014-cü ilə qədər buranı idarə edən oliqarxlara dəstək veriləcək. Bununla da Moskva Kiyevə təzyiq etməyə çalışacaq".