Rusiyalı müxbirin Türkiyə ilə bağlı sualı ABŞ Dövlət Departamentinin sözçüsü Con Kirbini özündən çıxardıb.

Axar.az xəbər verir ki, gündəlik mətbuat brifinq zamanı Kirbi RT televiziya kanalının Vaşinqton müxbiri Qayane Çiçakyanın təkidlə Türkiyə ilə bağlı eyni sualı soruşmasından sonra əsəblərinə hakim ola bilməyib və sərt reaksiya göstərib:

"Utanmadan bu sualı soruşa bildiyinə təəccüblənirəm, Rusiya hökumətinə vermədiyin sualı məndən niyə soruşursan?"

Qeyd edək ki, Qayane Çiçakyan Kirbiyə bu sualı ünvanlayıb:

"Türkiyənin İraqa əsgər göndərməsini necə qiymətləndirirsiniz?"

Kirbi suala son 3 gündür eyni cavabı verdiyini bildirib: "Türkiyə və İraq problemin həlli üçün lazımi danışıqları aparır".

Cavabdan məmnun qalmayan müxbir sualın formasını dəyişib və eyni sualı yenə soruşub.

ABŞ rəsmisi "Gülmək istəyirsənsə, verdiyin suallara bax, çox həyəcanlısan", - deyərək müxbiri susdurub.

Sakit davranışları ilə tanınan Con Kirbinin bu reaksiyası hər kəsin diqqətini çəkib.