Antirusiya sanksiyaları kontekstində Qərbdən Ermənistana təzyiq riski mövcud olub və olmaqda davam edir.

Axar.az xəbər verir ki, bu sözləri Ermənistanın keçmiş baş naziri Tiqran Sərkisyan deyib.

O, belə bir riskin antiiran sanksiyalarının pik nöqtəsində də mövcud olduğunu xatırladıb.

“Lakin İran Ermənistanın ən yaxın qonşusudur və sanksiyalara baxmayaraq, onunla heç vaxt iqtisadi əlaqələrini kəsməyib. İqtisadi əməkdaşlığın inkişafı Ermənistanın maraqlarından irəli gəlir. Eyni şey indi də Rusiya iqtisadiyyatına qoyulan məhdudiyyətlər fonunda belədir. Ermənistan mövcud vəziyyətdən maksimum fayda əldə etmək üçün hər şeyi etməlidir. Və deməliyəm ki, o, bu faydanı alır", - Sərkisyan bildirib.

O əlavə edib ki, antirusiya sanksiyaları Ermənistana həm risklər, həm də yeni imkanlar yaradır.

Qeyd edək ki, ABŞ Dövlət Departamentinin sanksiyalar üzrə koordinatoru Ceyms Obrayen Rusiyaya sanksiyaları dəlməsində Ermənistanın da aktiv yardım etdiyini açıqlayıb.

Ermənistan Rusiyaya sanksiyaların dəlinməsində iştirakına görə milyardlarla dollar gəlir əldə edir.