Ukraynanın rus hərbçilərinə qarşı pilotsuz təyyarələrdən istifadə təcrübəsi ABŞ ordusunu öz pilotsuz sistemlərini qurmaqda strateji səhvlərdən xilas etdi.

Axar.az xəbər verir ki, bu barədə “Air And Space Forces Magazine” məlumat yayıb.

Qeyd olunur ki, 2023-cü ilin sentyabrında Pentaqon “Replicator” proqramını işə salıb. Bu proqram çərçivəsində ABŞ qoşunlarının PUA-lar və düşmənin dronlarına qarşı mübarizə vasitələri ilə təmin edilməsi planlaşdırılır.

Pentaqonun Müdafiə İnnovasiyaları İdarəsinin direktor müavini Aditi Kumarın sözlərinə görə, bu layihənin birinci mərhələsi - minlərlə aşağı qiymətli avtonom platformanın qoşunlara çatdırılması - 2025-ci ilin iyul ayına qədər tamamlanmalıdır:

"Bundan sonra ikinci mərhələ başlayır - dron əleyhinə sistemlərin tədarükü".

"Replicator" proqramının həyata keçirilməsi problemlərindən danışan Kumar Ukrayna təcrübəsinin Pentaqon üçün çox faydalı olduğunu etiraf edib:

"Ukrayna təcrübəsi bizim üçün çox faydalı oldu və proqram yeniləmələrinin üç-dörd həftə ərzində baş verməli olduğunu göstərdi".

Onun sözlərinə görə, Pentaqon ABŞ silahlarının proqram təminatının yenilənməsi üçün heç vaxt kifayət qədər maliyyə ayırmayıb, ona görə də yeniləmələr sürətli olmayıb.