Türkiyə Prezidenti Rəcəb Tayyib Ərdoğan İstanbul Böyükşəhər Bələdiyyəsinin sədri Əkrəm İmamoğlunun korrupsiya və terror ittihamları ilə saxlanılması haqda danışıb.

Axar.az xəbər verir ki, Ərdoğan Ankarada təşkil edilən "Əvvəlki dönəm millət vəkilləri ilə iftar" proqramında çıxışı zamanı bu mövzuya toxunub.

Prezident müxalifətin səhvlərini daha böyük səhvlərlə ört-basdır etməyə çalışdığını vurğulayıb.

O, müxalifətin məhkəmənin ortaya qoyduğu ittihamlara cavab vermək əvəzinə, siyasi şüarlara sığındığını qeyd edib:

"Məsələni siyasi şüarlarla məhdudlaşdırıb xalqı aldatmağa çalışırlar. Əgər desələr ki, bu diplom qanuni yolla alınıb, bunu hüquqi müstəvidə müzakirə etmək olar. Yaxud desələr ki, bələdiyyədə oğurluq, korrupsiya, qeyri-qanuni əlaqələr yoxdur, biz bunu hüquqi sübutlarla müzakirə edə bilərik. Amma bunu etmirlər, edə bilmirlər. Çünki bunların doğru olduğunu ən yaxşı özləri bilirlər".

O qeyd edib ki, CHP-nin məsələləri ölkə və xalqın deyil, partiya daxilindəki bir neçə şəxsin maraqlarıdır:

"Bu məlumat və sənədlərin çoxunun məhz öz partiyaları tərəfindən məhkəməyə təqdim edildiyinin fərqindədirlər. Xalq qarşısında timsah göz yaşları tökən CHP rəhbərləri bağlı qapılar arxasında sevinirlər. CHP-nin məsələləri ölkə və xalqın deyil, partiya daxilindəki bir neçə şəxsin maraqlarıdır. Bizim isə bu kimi oyunlara ayıracaq vaxtımız yoxdur".