Rusiya geosiyasi baxımdan məğlubiyyətə uğrayıb, çünki işğalın başladığı 24 fevral 2022-ci ildə müdafiə-sənaye kompleksi, uzaqmənzilli silahları və hazırlıqlı ordusu demək olar ki, olmayan bir ölkənin hətta dörd vilayətini belə ələ keçirə bilməyib.

Axar.az xəbər verir ki, bu barədə Ali Radanın Milli təhlükəsizlik, müdafiə və kəşfiyyat məsələləri komitəsinin katibi Roman Kostenko bildirib.

Onun sözlərinə görə, Rusiya daim özünü dünyanın ikinci ordusu (ABŞ-dan sonra) kimi təqdim edirdi:

"Onlar bəyan edirdilər ki, hər şeyləri var, nüvə dövlətidirlər, lakin bunu (işğalı - red.) edə bilmədilər və üstəlik, öz ərazilərinə müdaxiləyə yol verdilər. Ona görə də hətta atəşkəs olsa belə, bu, onlar üçün geosiyasi məğlubiyyət olacaq".

Kostenko qeyd edib ki, ruslar hər şeyi anlayırlar. Buna görə də həm diplomatik prosesdə, həm də hərbi müstəvidə Ukraynanın ya bir hissəsinə, ya da bütün ölkəyə nəzarəti ələ keçirməyə çalışacaqlar.