Rusiyada ötən ilin yekunlarına görə, 2970 KİV bağlanıb ki, onların da böyük əksəriyyəti çap mediasıdır.

Axar.az xəbər verir ki, bu barədə “İnterfaks” İnformasiya Agentliyinin baş direktorunun müavini Yuri Poqoreli deyib.

“Çap mediası üçün fiziki infrastruktur daralmaqda davam edir. Çap həm yayım, həm də fiziki istehsal baxımından olduqca çətin vəziyyətdədir”, - o bildirib.

Poqoreli əlavə edib ki, yeni çap mediasının əksəriyyəti elmi və tematik jurnallar, eləcə də əyləncə nəşrləridir. Yeni qeydiyyatdan keçən onlayn medialar arasında isə dövlət qurumlarının uzun müddət fəaliyyət göstərən, lakin hazırda rəsmi media statusu almış saytları da var.

Poliqrafiya Sənayesi Müəssisələri İttifaqının məlumatına görə, son 20 ildə Rusiyada mətbuat köşklərinin sayı 4 dəfə azalıb. Köşklərin sayının azalmasına icarə haqqının artması və regional idarələrin distribyutorlarla müqavilələri yeniləməkdən imtina etməsi təsir göstərir.