Avropa Birliyi Qəzzada baş verən müharibə ilə əlaqədar İsraillə ticarət assosiasiyası haqqında sazişə yenidən baxılması barədə qərar qəbul edib. Bundan əlavə, bəzi AB ölkələri İsrailə təzyiqləri artırıb.

Axar.az xəbər verir ki, bu barədə “Quardian” nəşri yazıb.

Qeyd olunur ki, İrlandiya və İspaniya liderləri Avropa Komissiyasının rəhbəri Ursula fon der Leyenə İsraillə ticarət assosiasiyası sazişinə yenidən baxmaq çağırışını təxminən 15 ay əvvəl etmişdilər. Qəzza zolağında humanitar böhranın daha da dərinləşməsi fonunda ötən gün AB ölkələrinin xarici işlər nazirləri həmin sazişi müzakirə ediblər.

Eyni zamanda bildirilir ki, ABŞ Prezidenti Donald Tramp da İsrailin Fələstin əleyhinə hərbi əməliyyatları dayandırmamasından narahatdır.

Qeyd edək ki, ötən gün Böyük Britaniya hökuməti İsraillə azad ticarət danışıqlarını dayandırıb və İordan çayının qərb sahilindəki yaşayış məntəqələrinə yeni sanksiyalar tətbiq edib.