Avropa Komissiyası (AK) Rumıniyaya 869 milyon avro vəsaitin transferini dayandırıb, çünki ölkə hakimiyyəti iki əsas şərti yerinə yetirməyib.

Axar.az xəbər verir ki, bu barədə Sərmayələr və Avropa layihələri naziri Marsel Bolos məlumat yayıb.

O bildirib ki, vəsaitin 814 milyon avrosu qrant, 55 milyon avrosu isə kredit komponentidir.

Tranşın dayanmasının səbəbləri isə budur: 1. Rumıniya Dövlət Müəssisələrinin Monitorinqi və Qiymətləndirilməsi Agentliyinin rəhbəri AK meyarlarına uyğun seçilməyib; 2. Keçmiş dövlət qulluqçularının pensiyalarının artırılmasını nəzərdə tutan pensiya islahatı məhdudlaşdırılıb.

“Rumıniya hökuməti noyabrın 28-dək bütün islahatları həyata keçirməli və AK-dən razılıq almalıdır. Əks halda, vəsait geridönməz şəkildə AB büdcəsinə qaytarılacaq”, - nazir vurğulayıb.