Çin Prezidenti Si Szinpin və ABŞ Prezidenti Donald Tramp telefon danışığı zamanı ticarət-iqtisadi danışıqların yeni raundunun ən qısa zamanda keçirilməsi barədə razılığa gəliblər.

Axar.az xəbər verir ki, bu barədə Çin Mərkəzi Televiziyasının məlumatında deyilir.

Dövlət başçıları tərəflərin Cenevrə konsensusunu həyata keçirməyə davam edəcəkləri və mümkün qədər tez şəkildə danışıqların yeni raundunu keçirəcəkləri barədə razılığa gəliblər.

"Hər iki tərəf ticarət-iqtisadi məsləhətləşmələr mexanizmindən səmərəli istifadə etməli, bərabər münasibətə riayət etməli, bir-birinin maraqlarına hörmət etməli və qarşılıqlı faydalı nəticə əldə etməyə çalışmalıdır", - S.Szinpin bildirib.

O əlavə edib ki, Çin bu məsələdə səmimi və prinsipialdır.

Qeyd edək ki, mayın 10-11-də İsveçrədə ABŞ-Çin ticari-iqtisadi danışıqları keçirilib. Onların nəticələrindən sonra tərəflər mayın 14-dən tariflərin qarşılıqlı azaldılmasını elan ediblər.