Pis atəşkəs yaxın bir neçə il ərzində İran və İsrail arasında növbəti müharibəyə səbəb olacaq.

Axar.az xəbər verir ki, bu sözləri İsrailin müxalifət partiyasının sədri Aviqdor Liberman deyib.

Ölkənin son həftə yarım ərzində əldə etdiyi inanılmaz hərbi nailiyyətlərin ardınca İranın İsrailə qarşı son hücumlarını xüsusilə sarsıdıcı və acı adlandıran Liberman dünyanın qeyd-şərtsiz təslim əvəzinə İranla çətin və yorucu danışıqlara girəcəyindən təəssüfləndiyini bildirib.

O qeyd edib ki, ayətullah rejimi nə İran torpağında uranın zənginləşdirilməsi, nə ballistik raketlərin istehsalı və təchiz edilməsi, nə də regionda və dünyada terrorizmin dəstəklənməsi və maliyyələşdirilməsi məsələsində təslim olmaq niyyətindədir:

“Artıq müharibənin əvvəlində xəbərdarlıq etdim ki, aslanı yaralı qoymaqdan təhlükəli bir şey yoxdur. Aydın və birmənalı razılaşma olmadan atəşkəs bizi iki-üç ildən sonra və daha pis şərtlər altında növbəti müharibəyə aparacaq”.