Beynəlxalq investorlar ABŞ Prezidenti Donald Trampın Rusiyaya qarşı ikinci dərəcəli sərt sanksiyalar tətbiq etmək hədələrinə inanmırlar.

Axar.az xəbər verir ki, bu barədə Britaniyanın “Ekonomist” jurnalında yayımlayan məqalədə deyilir.

Nəşrin yazdığına görə, nəzəri cəhətdən Tramp Rusiyaya sanksiyalar tətbiq edə bilər ki, bu da Moskvanın neft ixracından əldə etdiyi gəlirin nəzərəçarpacaq dərəcədə azalmasına səbəb olacaq.

Bununla belə, jurnalın əlavə etdiyi kimi, həqiqətən də ciddi məhdudiyyətlər qlobal bazarlarda əmtəə qiymətlərinin artmasına səbəb ola bilər ki, bu da ABŞ-ın özündə “inflyasiya şokuna” gətirib çıxarar.

Qeyd edilir ki, Ağ Evin Çinlə genişmiqyaslı ticarət müharibəsinə girmək istəmədiyini və Hindistanla davam edən danışıqları nəzərə alsaq, Trampın sanksiyalarla bağlı hədələrini inandırıcı hesab etmək olmaz.