Veysəloğlu MMC-nin Azərbaycanda “Malyutka” uşaq qidasının satışını həyata keçirməsi ilə bağlı məlumatlar həqiqəti əks etdirmir.

Axar.az xəbər verir ki, bu barədə məlumatı “Veysəloğlu” şirkətinin mətbuat katibi İlham Məmmədzadə yayıb.

O bildirib ki, şirkət 2018-ci ilin aprel ayından etibarən bu məhsulun idxalını dayandırıb:

“Veysəloğlu MMC 2007-2018-ci illərdə “Nutricia” (Niderland Krallığı) şirkəti ilə əməkdaşlıq edib və qeyd edilən şirkətin məhsulları olan “Nutrilon” və “Malyutka” markalarının respublikamıza dağıtımını həyata keçirib. Lakin 2018-ci ilin aprel ayından etibarən şirkətimiz “Nutricia” şirkətinin məhsullarının idxalını tam dayandırıb. 1 noyabr 2018-ci il tarixindən etibarən isə adı çəkilən istehsalçı şirkətlə əməkdaşlıq müqaviləsinə rəsmi formada xitam verilib.

“Nutricia” şirkətindən ən son idxal etdiyimiz məhsulların (“Malyutka - 2” - 350 qr) son istifadə tarixi 06.03.2020-dir. Mətbuatda yayılan fotolarda isə qeyd edilən məhsulun son istifadə tarixinin 19.03.2020 olduğu görünür. Yəni mediada şəkilləri yayılan “Malyutka - 2” uşaq qidası Veysəloğlu MMC-nin bu məhsulun idxalına dair müvafiq şirkətlə müqaviləsinə xitam verdikdən sonra bizə aidiyyəti olmayan digər bir şirkət tərəfindən ölkəyə gətirilib.

Xüsusi olaraq qeyd etmək istərdik ki, Veysəloğlu MMC tərəfindən 1 aprel 2018-ci il tarixindən etibarən “Nutricia” şirkətinin məhsulu olan uşaq qidasının idxalı ilə bağlı “Nutricia” şirkətinə sifariş verilməyib. Xitam müqaviləsinin imzalanmasına qədər (1 noyabr 2018-ci il tarixinədək) satılan bütün məhsullarla bağlı Veysəloğlu MMC məsuliyyət daşıyıb. Əməkdaşlıq müqaviləsinə xitam verilməsi ilə əlaqədar olaraq, qeyd edilən tarixdən etibarən respublikamıza idxal edilən “Nutricia” fabrikinin bütün məhsulları, həmçinin də mətbuatda adı hallanan “Malyutka - 2” ( 350 qr) uşaq qidası ilə bağlı yaranan hər hansı bir problemə görə Veysəloğlu MMC məsuliyyət daşımır”.

İ.Məmmədzadə onu da qeyd edib ki, şirkət həmin malları İDC 2000 şirkətinin iştirakı ilə rəsmi qaydada məhv edib:

“Bundan başqa, “Veysəloğlu”nun hüququ pozulduğu üçün istehsalçı və idxalçı şirkət haqqında hüquq-mühafizə orqanlarına müraciət ediləcək”.

Qeyd edək ki, Azərbaycan Qida Təhlükəsizliyi Agentliyi (AQTA) və Baş Prokurorluq zərərli uşaq qidası ilə bağlı birgə məlumat yayıb. Məlumatda bildirilib ki, “Malyutka - 2” əmtəə nişanlı uşaq qidası ilə bağlı daxil olan şikayət əsasında Agentliyin və Baş prokuror yanında Korrupsiyaya qarşı Mübarizə Baş İdarəsinin əməkdaşları tərəfindən birgə əməliyyat tədbiri həyata keçirilib. Araşdırmalar zamanı müxtəlif satış şəbəkələrində “Malyutka-2” əmtəə nişanlı uşaq qidasına baxış keçirilib və məhsulun içərisində istehlak üçün yararsız yad cisimlər aşkar olunub.

Hazırda həmin məhsulların mənbəyinin müəyyənləşdirilməsi istiqamətində işlər aparılır.

Mətbuatda isə “Malyutka-2” əmtəə nişanlı uşaq qidasının idxalçısının “Veysəloğlu” şirkəti olduğu bildirilib.