Rusiya-Azərbaycan münasibətləri “mülayim” və “soyuq” dövrlərin bir-birini tez-tez əvəz etdiyi mürəkkəb bir sistemdir. Düşənbə görüşünə gəlincə, son bir ildə, xüsusən də təyyarə qəzasından sonra ilk dəfə keçirilən görüş müəyyən razılaşmaların nəticəsi idi. Danışıqların əvvəlinin demək olar ki, tamamilə təyyarə qəzası mövzusuna həsr olunması xarakterikdir. Burada Putinin dedikləri də diqqət çəkirdi. Rusiya liderinə faciənin yeni təfərrüatı barədə görüşdən bir-iki gün əvvəl məlumat verilib. Bu açıqlama suallar doğurur, çünki təbii fəlakət ötən ilin dekabrında baş verib və o zaman Putin-Əliyev arasında telefon danışığı baş tutub. Ona görə də söhbət köhnə hadisələrdən yox, bəzi yeni təfərrüatdan gedir.

Axar.az xəbər verir ki, bunu erməni politoloq Akop Badalayan deyib.

“Azərbaycan prezidentinin verdiyi təfərrüatlı məlumata görə Putinə təşəkkür etməsi isə Rusiyanın mühüm, yeni bir informasiya təqdim etdiyini deməyə əsas verir. Məhz bu dəyişiklik iki lider arasındakı atmosferə təsir edə bilər. Təyyarə fəlakəti Azərbaycana təzyiq göstərmək, onu Rusiyaya qarşı daha sərt tədbirlərə sövq etmək üçün istifadə oluna bilərdi. Bunda Britaniyanın marağı var idi. London qəza araşdırmasında iştirak edən Azərbaycan və Qazaxıstan istintaq orqanları ilə qarşılıqlı əlaqədə olmaq üçün rəsmi olaraq öz nümayəndələrini də təyin etmişdi. Bu, prosesdən geosiyasi məqsədlər üçün istifadə cəhdindən xəbər verir. Böyük Britaniya Rusiyanın əsas rəqiblərindən biridir və Azərbaycan Londonun əhəmiyyətli təsiri altındadır. Hətta Britaniya nümayəndələri Bakını təyyarə qəzası ilə bağlı Beynəlxalq Məhkəməyə müraciət etməyə çağırıblar. Ona görə də Əliyev faciədən doqquz ay sonra yeni təfərrüatı çatdırdığı üçün Putinə təşəkkür etdi.

Ehtimal etmək olarmı ki, söhbət təkcə texniki detallardan deyil, həm də daha dərin geosiyasi aspektlərdən gedir?” - o bildirib.