Qırğızıstan Prezidenti Sadır Japarov bu gün Bişkekdə Azərbaycan Milli Məclisinin sədri Sahibə Qafarovanı qəbul edib.

Axar.az xəbər verir ki, bu barədə Qırğızıstan Prezident Administrasiyası məlumat yayıb.

Görüş zamanı tərəflər Qırğızıstan-Azərbaycan əməkdaşlığının ticarət-iqtisadi, investisiya, energetika və nəqliyyat sahələrində gələcək inkişaf perspektivlərini müzakirə ediblər.

Dövlət başçısı Qırğızıstanla Azərbaycan arasında müttəfiqlik münasibətlərinin xüsusi xarakterini vurğulayaraq, əldə olunmuş razılaşmaların ardıcıl şəkildə həyata keçirilməsinin vacibliyini qeyd edib. O, bu ilin iyul ayında Azərbaycanın Prezidenti İlham Əliyevin Qırğızıstana dövlət səfəri zamanı imzalanmış Müttəfiqlik münasibətləri haqqında Müqavilənin icrasının əhəmiyyətinə xüsusi diqqət çəkib.

Öz növbəsində, Sahibə Qafarova Sadır Japarova və qırğız xalqına İlham Əliyevin salamlarını və xoş arzularını çatdırıb.

Milli Məclisin sədri ikitərəfli münasibətlərin, o cümlədən parlamentlərarası əməkdaşlığın dinamik inkişaf etdiyini bildirib və iki ölkə arasında əməkdaşlığın daha da möhkəmləndirilməsinin vacibliyini vurğulayıb.