Yanvarın 11-də Azərbaycan, Rusiya və Ermənistan liderlərinin Moskvada keçirilən görüşü Yaponiya kütləvi-informasiya vasitələrinin də diqqət mərkəzindədir.

Axar.az xəbər verir ki, Yaponiyanın NHK telekanalı və “Nikkei” qəzeti Rusiya Prezidentinin təşəbbüsü ilə keçirilən görüş, müzakirə olunan məsələlər və qəbul edilən üçtərəfli bəyanat barədə ətraflı məlumat yayıblar. İnformasiyalarda vurğulanıb ki, bu, ötən ilin sentyabrında başlayan və noyabrda başa çatan müharibədən sonra tərəflər arasında keçirilən ilk görüşdür.

Bildirilir ki, görüşdən sonra açıqlama verən liderlər üç ölkənin icra strukturlarının iştirakı ilə bərpa işlərinin aparılması məqsədilə işçi qrupun yaradıldığını elan ediblər.

Azərbaycan Prezidenti İlham Əliyevə istinadla atəşkəs haqqında razılaşmanın icra olunduğu və hazırkı vəziyyətlə əlaqədar məmnunluğunu ifadə etdiyi vurğulanıb.

Yazılarda münaqişənin tarixinə nəzər salınıb, Azərbaycanın 30 ilə yaxın işğal altında saxlanılan torpaqlarının son döyüşlər nəticəsində azad edildiyi qeyd olunub.